Улаанбаатар
Үндэсний мөнгөн тэмдэгт солилцох своп хэлцлийг өргөжүүлэхийг уриалав
МОНГОЛЫН МЭДЭЭ | ЭДИЙН ЗАСАГ
Улаанбаатар, 2024 оны дөрөвдүгээр сарын 2 /МОНЦАМЭ/.Монголбанкны Ерөнхийлөгч Б.Лхагвасүрэн БНХАУ-ын Хайнань мужийн Боао хотод болсон “Азийн чуулга уулзалт -2024 “-ын үеэр Азийн санхүүгийн зах зээлийн хөгжил ба санхүүгийн даяаршлын асуудлаарх дугуй ширээний уулзалтад оролцов.
Уулзалтын үеэр Азийн
бүс нутгийн санхүүгийн зах зээлийн хөгжил, санхүүгийн нээлттэй байдлаа улам
өргөжүүлж, гадаадын хөрөнгө оруулалтыг нэмэхэд баримталж буй бодлогод хандуулж саналуудаа илэрхийлжээ. Монголбанкны Ерөнхийлөгч
Б.Лхагвасүрэн, бүс нутгийн
санхүүгийн хамтын ажиллагааг гүнзгийрүүлэхийн чухлыг онцолж, худалдааг
хөнгөвчлөхийн тулд үндэсний мөнгөн тэмдэгт солилцох своп хэлцлийг өргөжүүлэх
талаар олон талт алхамд уриалав. Мөн
Азийн жижиг орнуудыг багтаасан санхүүгийн тогтолцоо бий болгох нь зах зээлийн
хөрвөх чадварыг дэмжих, бүс нутгийн худалдааг хөнгөвчлөх замаар эдийн засагт
ашигт тусаа өгнө гэж үзэж буйгаа
илэрхийлснийг төв банк мэдээллээ.
Дугуй ширээний уулзалтад Боаогийн Азийн чуулга уулзалтын дэд
дарга Жөү Шиаочуан, Лаосын Төв банкны Ерөнхийлөгч Бунлеуа, Тайландын Төв банкны
Дэд ерөнхийлөгч Алисара Махасандана,
ОУВС, АХБ, Олон улсын төлбөр тооцооны банк болон бусад санхүүгийн
байгууллага оролцжээ.
